Sosue 8

Nyɔsoa 'wlu 'de Sosue' -pee ɛ 'na: Faʋn 'de -ʋn -nʋɛ', 'kpɩ 'de -ʋn "i waa! -Ɩn -ke tʋ -fʋn -nyʋ -wee' "klein mu ao 'je Ai tʋ o -fʋn'! Dɛ-nʋɛ' 'ɩn -sa Ai 'a 'blʋa jei o, ɔɔ' 'blee nyʋ o, ɔɔ' "kwi -kwlɔ ke ɔɔ' 'blʋa -wee' "klein ʋʋ 'je -ma dɛ nɩ. 2 Ka -ɩn nʋa Seriko ke ɛɛ' 'blʋa jei 'kamɔ -ɩn -je Ai ke ɛɛ' 'blʋa jei nʋ -ke. 'Kaa ao 'bɛɛ ao 'je ʋʋa' "wliiɛ ke "nɔdɩ 'ʋn "duo ka dɩ -jea' 'de tʋ 'ʋn nɩa. -Ɩn -tu" tʋ -fʋn -nyʋ 'kwla 'de "kwi -kwlɔ -nɛ 'de.

3 Sosue' ke ɔɔ' tʋ -fʋn -nyʋ -wee' 'kpa -jei" ʋʋa muɛ Ai tʋ o -fʋan'. Ɔ -sae' tʋ -fʋn -nyʋ -kua 'e 'dei 'a "wlu taan -ʋʋ -mu' "maʋ 4 -wɛe ɔ -tu" ʋʋpʋ 'srɩn ka: Ao pa 'kwla 'de "kwi -kwlɔ -nɛ 'de ao 'boɛ o teɛn, ao -wee' -te -fʋn 'a kein" ke. 5 'Ɩn ke tu -fʋn -nyʋ -siae' -wee' "klein a muɛ "kwi -kwlɔ -nɛ -pʋn" 'kpaa. -Bo Ai nyʋ "si "kpae -wɛe ʋʋ 'je -a tʋ o -fʋn 'a ji ka ʋʋa nʋa "i -saa nɔ" ɛ, -aa muɛ ʋʋpʋ "juɛi i plea'. 6 Ʋʋa muɛ -a i nʋa' -wɛe -a -jeɛ nʋ ʋʋpʋ 'je "kwi -kwlɔ o tɛɛn-. -Bo ɛ nɩ 'kaan a -mɛ ʋʋa muɛ nʋa' -aa pleɛ ʋʋpʋ "juɛi i ka -aa nʋa tɛin" ɛ. 7 'De ɛ sie 'sʋ aoa jea 'kwla 'wlʋ aoa jea "kwi -kwlɔ -nɛ kpʋn. Dɛ-nʋɛ' mɛ -nɩ Nyɔsoa aoa' Kea -sɛ sʋn "kpei 'de ao 'kwa. 8 -Bo ao kpʋn "kwi -kwlɔ -nɛ "kpɩ, -mɛ ao poɛ "jri ka Nyɔsoa 'a wlu "sia ɛɛ' 'nynɩ ɛ. Dɩ 'ɩn 'na ao nʋ mɩ -nao.

9 Sosue' dboɛ tʋ -fʋn -nyʋ -nʋ 'mɛ -wɛe ʋʋpʋ pa 'kwla 'de Betɛlɩ ke Ai 'nynɩ, 'de Ai 'a 'jrʋ 'a blu 'na fɔo, 'de -mɛ Sosue' ke 'blʋa -siae' nɩɛ "nyɩɔ 'kpaa.

10 -Sɔn dee -sɩan 'sʋ Sosue' 'pɛn kpaa" "kpei i -wɛe ɔ -gbʋn ɔɔ' tʋ -fʋn -nyʋ ja, 'sʋ ɔ kɔn 'de ʋʋpʋ nya ɔ ke Israɛ -nyʋ 'a klae" ke -wɛe ʋʋ mu Ai tʋ o -fʋn 'a. 11 Tʋ -fʋn -nyʋ -wee' "klein -ʋʋ "juɛi ɔ nɩa 'kpaa 'e 'wɛ mamaʋ 'sʋ ʋʋ je 'de "kwi -kwlɔ -nɩa 'mʋa- "juɛi nyni. Ʋʋpʋ poɛ ʋʋa' -kwlena' 'de Ai -kwlɔ 'ɔ 'kwea fɔo, wlao mɛ -nɩ 'de ʋʋpʋ 'nynɩ. 12 Tʋ -fʋn -nyʋ -bɛa' nyɩɔ 'ɔ "wlu -mm" mʋ Sosue' "duo 'ʋn ɔ -tu" 'de Betɛlɩ ke Ai 'nynɩ, 'de "kwi -kwlɔ -nɛ 'ɛ 'jrʋ 'a i blʋ 'ɩn fɔo. 13 "Sooa 'a kpɔ -jʋ -tia "i poɛ ʋʋa' -kwlena' "jɛi 'de 'kwea fɔo 'de -mɛ ʋʋa' -jʋ -nɩa 'de de fɔo -mʋ nɩɛ 'de 'jrʋ 'a i blʋ 'ɩn. 'De ɛɛ' "maʋ wɩ tu 'di ɛ, Sosue' muɛ 'de wlao 'di "i 'craa ɔ 'je 'de "i juo-.

14 -Ta Ai nyʋ 'a 'blʋa jei 'jea dɩ -nɩa nʋa' 'sʋ ɔ -too" ɔ -sa "nynuʋ nmai -nɩa 'de "kwi -kwlɔ 'di -wee' -kwlu' -wɛe ʋʋpʋ crɛɛ "kpei ʋʋ mu tʋ -fʋn na' 'de ʋʋ ke Israɛ -nyʋ 'je -fʋn' 'de Alaba 'a wlao 'di. Ɔ seɛ juo ka nyʋ deejrʋ' pa 'kwla ʋʋ nɩɛ ɔɔ' fʋa' 'de "kwi -kwlɔ -nɛ 'de ɛ 15 Sosue' ke Israɛ -nyʋ nʋɛ ka tʋ 'a dua nyʋ ɛ -wɛe ʋʋa ple ʋʋpʋ "juɛi i ʋʋa mu 'de -pɩɩɔn" blʋa "kpei. 16 Ʋʋa "wɔɔ ʋʋa jea 'blʋa -wee' "klein -nɩa 'de Ai -kwlɔ -nɩa 'mʋa- 'di a 'daa ʋʋ 'je nyʋ -nʋ inʋ. Ʋʋa crɛɛ "kpei ʋʋa jea Sosue' inʋ, ɛ nʋɛ' 'sʋ ʋʋ je ʋʋa' "kwi -kwlɔ o tɛɛn-. 17 Nyɔjrɔ' se 'de Ai ke Betɛlɩ sie -ɔ -se' "kpae "si -ɔ -se' Israɛ -nyʋ inʋ. Ɛmɛ -nʋɛ' ʋʋ je "kwi -kwlɔ wɔn flɔn -ɔ ʋʋ je Israɛ -nyʋ inʋa' mu. 18 'Sʋ Nyɔsoa wluɛ 'de Sosue' -pee ɛ 'na: -to -ma "di -ɩn -blea kwa 'de Ai fɔo dɛ-nʋɛ' mɛ -nɩ 'ma muɛ "kwi -kwlɔ -nɛ sʋn "kpei -saa' 'de -ʋn 'kwa. Sosue' toɛ ɔɔ "di 'de Ai fɔo. 19 Ɔ sroa sʋn 'sʋ, nyʋ -pa' 'kwla "siɛ "kpae sɔɔn- -wɛe ʋʋ ple ʋʋ mʋ 'de "kwi -kwlɔ 'di fɔo, ʋʋ pa 'e, ʋʋ kpʋn ɛ -wɛe ʋʋ poɛ "jri. 20 -Ta Ai nyʋ "bia de -wɛe ʋʋ kpa "jri "jɛi 'sʋ ʋʋa 'jeɛ dao' -gblʋn -a sɔn -kwlu 'de ʋʋpʋ 'a "kwi -kwlɔ 'di. Ʋʋ se nɔ" mɔ 'ble -wɛe ʋʋ 'je 'kwla 'kpa, ʋʋ -sa ʋʋpʋ -je 'kwa, ʋʋ se 'bɛɛ ʋʋ 'je 'fɔ jrɛ' "i 'wlʋ ʋʋ 'je 'fɔ jrɛ' "i muu-, dɛ-nʋɛ' mɛ -nɩ nyʋ -nɩa plea' -ʋʋ nɩa -pɩɩɔn" blʋa "kpei mua' "biiɛ de 'de nyʋ -nɩa ʋʋpʋ inʋa' "kpei. 21 Dɛ-nʋɛ' mɛ -nɩ Sosue' ke Israɛ -nyʋ 'jea 'kan ka nyʋ ʋʋ -tua" i kpʋan "kwi -kwlɔ 'mɛ -wɛe ʋʋ poɛ "jri 'sʋ ɛ, ʋʋ "biiɛ de -wɛe ʋʋ ji Ai nyʋ tʋ o -fʋan'. 22 Tʋ -fʋn -nyʋ -nɩa 'de "kwi -kwlɔ 'di 'wlʋe 'wɛ -wɛe ʋʋ ji ʋʋa' 'cɛ o, ɛ nʋɛ' 'sʋ Israɛ -nyʋ -pɩn' ʋʋpʋ 'mɛ -wɛe ʋʋa' tʋ dʋ ʋʋpʋ ʋʋ se nyɔjrɔ' 'kmʋ sie. 23 Ai 'a 'blʋa jei se 'mɛ ʋʋ jeɔ kpʋn ʋʋ jeɔ Sosue' ja-. 24 Israɛ -nyʋ 'dba Ai nyʋ -wee' 'mɛ, -bo ɛ nɩ 'de 'kwla 'di, -bo ɛ nɩ 'de -pɩɩɔn" blʋa "kpei ʋʋa nʋ ʋʋpʋ i ʋʋa jea -placnɛ nʋ ʋʋa jea ʋʋpʋ 'dba 'sʋ ʋʋa jea 'e -kwɛ'. -Mɛ 'wlua 'e -jei" 'sʋ, Israɛ -nyʋ -wee' "klein pa 'de "kwi -kwlɔ -nɛ 'di -wɛe ʋʋ 'dba nyʋ -nɩa 'e -wee'-. 25 Ai nyʋ -nɩa nyɩɔ 'ɔ "wlu 'a -puue 'jɔ 'sɔɔn mɔ 'ɔ -cɛ", "nynuʋ nmai ke 'nynʋkpae -wee' 'mɛɛ 'de ɛɛ' 'wɩ tu 'di. 26 Sosue' se ɔɔ' "di i kpʋn -tɩ 'bɔ mamaʋ 'sʋ ʋʋ je nyʋ -nɩa 'de Ai ʋʋ "nyɩ 'a Kea -wee' 'a ma" i -sa. 27 'Kaa 'de Nyɔsoa 'a wlu "kpei 'de Sosue' -pee ɛ, Israɛ -nyʋ "duɛ "nɔdɩ ke "wliiɛ -nɩa 'de "kwi -kwlɔ -nɛ 'di 'ʋn 'ɛ. 28 Sosue' poɛ Ai "jri, -wɛe ɛ nʋ 'kao kpɩɩn', -ta nyʋ sea 'bɛɛ ɔ 'jea -kwle 'bode ɛ, 'ka ɛ nɩ -sɩan ke. 29 'De Ai 'a 'blʋa jei -mɔ ɛ, ʋʋ poɔ "dbu dɔ' 'de tu ja 'de ɔ 'mɛɛ- -wɛe ʋʋ "taa ɔɔ' "ku "i mamaʋ 'sʋ kwie kpʋn-. -Kwie" jrʋ o 'sʋ Sosue' 'na ʋʋ -sa ɔɔ' "ku 'de tu ja. Ʋʋ -fi" ɔ 'de "kwi -kwlɔ 'ɔ paana' -wɛe nyʋ po "soi -sro 'de ɔ "kpei -ɩ -nɩ 'e mʋ -sɩan ke.

30 'Sʋ Sosue' ma "kpa 'de Ebalɩ -crʋ "kpei 'de Nyɔsoa Israɛ -nyʋ 'a Kea 'a 'nynɩ 'ʋn 31 Ɔ ma "kpa ka Moisɩ -nɩa Nyɔsoa 'a dbo nʋɩ "sia 'nynɩ 'de Israɛ -nyʋ -pee ka ɛ 'crɩa 'de Moisɩ 'a kɛ' 'ɛ 'sbɛ 'di ɛ: Kpa -ɛ -nʋa "soi nɩɛ sea "i bla 'ʋn. 'Sraadɩ -ɩ -wee' nɛ dia ke nyɔ ke Nyɔsoa 'a "i "sia 'a 'sraa mɛ nyɔɔ -sa' 'de ɛ kpei. 32 Sosue' 'crɩɛ Moisɩ 'a kɛ' 'ɛ 'sbɛ ɔ 'crɩa 'de Israɛ -nyʋ -wee' "klein "juɛi 'a jrɛ' 'de "soi "kpei. 33 -Ta ɛ nɩa 'kan, -mɛ Israɛ -wee' ke ɛɛ -kekpasoa o, "sooa 'a kpae" ke ʋʋa' "jrukpɔ i -tenyʋ nyna i 'de Nyɔsoa 'a dbɛɛdɛ 'ɛ -gbau' 'de i 'de 'sraa -saʋn Lefi -ʋʋa -bleɛ "juɛi. 'Dʋɩ -tia" 'de ʋʋpʋ "kwlu ke Israɛ -nyʋ 'a -cɛkpa' nɩ 'e 'wɛ -ke. Ʋʋa' tɔo nyna 'de Karisimʋ -crʋ -pʋn" fɔo -wɛe tɔo -sia 'e mʋ nyna i 'de Ebalɩ -crʋ -pʋn" fɔo ka Moisɩ Nyɔsoa 'a dbo nʋɩ "sia 'nynɩ 'dee nyʋ 'jea nʋ ɛ -wɛe nyʋ 'jea Israɛ -nyʋ "diwan poɛ. 34 'De -mɛ 'de ɛ Sosue' nʋɛ kɛ' -ɩ -nɩa "Diwan ke 'daɩn kɩ nɩa 'de kɛ' 'ɛ 'sbɛ 'di -wee' 'di i. 35 'De Israɛ -nyʋ -wee' "klein -gbaea' o, 'nynʋkpae o, "nynuu "mɩɩ ke 'dʋɩ -tia" ʋʋpʋ "kwlu, Sosue' nʋɛ dɩ "klein Moisɩ "sia 'nynɩ ɔ nʋɩ 'di i ɔ se jrɛ' 'e sie.